Foto's

Toe die kerkgebou in 1936 opgerig is as die NG Kerk Pinetown, was die preekstoel aan die oostekant van die gebou, en die ingang wes. Daarna is dit omskep in 'n kleuterskool. Toe ons die gebou gekoop het, is dit weer omskep in 'n kerkgebou, met die preekstoel aan die westekant.

Die preekstoel was eers 'n kroeg! Toe die skip Owington Court in 1940 gesink het, is die toonbank aan Durban-Noord geskenk. Daar is dit as preekstoel gebruik. Toe Durban-Noord 'n nuwe kerkgebou opgerig het, is die preekstoel nie weer gebruik nie. Na die kleuterskool weer omskep is in ons kerkgebou in 1993, is die preekstoel aan Pinetown geskenk .
Die houtwerk agter die preekstoel is ontwerp deur Kiki Gey van Pittius en die houtwerk is gedoen deur Piet Vorster
Die doopvont is deur Leendert Lagendijk gemaak uit die potloodseder wat afgekap is om plek te maak vir die toegangshek.
Die tafel is gemaak deur Dries en Albert Venter; die bord en beker deur Leendert Lagendijk uit dieselfde potloodseder.
Die huidige Allan-kerkorrel is toegerus met 'n rekenaartjie waarop die begeleiding opgeneem kan word, en teruggespeel kan word as daar nie 'n orrelis is nie. Die Luidsprekers is in 'n kas wat deur Kiki Gey van Pittius ontwerp en gemaak is deur Piet Vorster
	Die gemeente het tans lidmate in Saudi Arabië, waar daar geen Christelike kerke is nie. Eredienste word vanuit die kerkgebou in beeld en klank direk na hulle uitgesaai.